حقيقة تصريحات وزيرة التضامن عن توقيع غرامة على أهل المنتحر

– ده تصريح مفبرك. وزير التضامن مقالتش أي تصريح بالمحتوى ده، وموقع المصري اليوم منشرش أي خبر فيه الكلام ده.✅ ✅

– بعد واقعة انتحار شاب من أعلى برج القاهرة، في أواخر شهر نوفمبر الماضي، انتشرت تصريحات مفبركة لعدد من المسؤولين تعليقًا على الواقعة، زي مثلًا تصميم منتشر عليه لوجو موقع “المصري اليوم” وفيه تصريح منسوب لزوجة الرئيس، السيدة انتصار السيسي بتقول فيه “بزعل أوي على الشباب اللي بينتحروا وأعتقد إن أسباب الانتحار هي الرفاهية الزايدة عن اللزوم”، لكن في الحقيقة التصريح مفبرك وزوجة الرئيس لم تعلق إطلاقًا على موضوع الانتحار.❌❌

– اللي بيفبرك التصريحات دي بيعتمد على تصميمات لمواقع إخبارية معروفة عشان يزود ثقة الناس في كلامه ويتم تداولها باعتبارها حقيقة، والحل الأفضل في الحالة دي، إن اللي يشك في خبر يدخل الموقع ويسيرش عليه أو يطلب من اللي نشره لينك له.✅✅