تهريب آثار في شحنة دبلوماسية مصرية

– على مدار اليوم صفحات كتير بتتكلم عن ضبط إيطاليا لآثار، وقالوا إنها كانت في شحنة دبلوماسية “مصرية”.. حاولنا نجمع المعلومات الموثوقة حول الموضوع حتى اللحظة👇👇.

– البداية كانت بأخبار نشرتها وسائل إعلام إيطالية أول امبارح، قالت إن محققي جمارك في مدينة سالرنو (جنوب إيطاليا) لقوا آثار فرعونية جوا كونتينر، كان ضمنها قناع ذهبي فرعوني وتابوت حجري ومُجسَم لقارب جنائزي.

– التقارير المتاحة مقالتش حتى الآن إن الشحنة الدبلوماسية “مصرية”، او تابعة لدولة إيه بالظبط، لكنها قالت إنها “دبلوماسية” وخرجت من ميناء الإسكندرية.

– بعض الصحف الإيطالية رجحت إن الواقعة جايز تكون ضمن تجارة داعش للآثار اللي حصلت كتير بآثار سوريا والعراق، وإن غرض العملية توفير تكاليف شراء أسلحة، لكن مفيش تفسير لإزاي آثار فرعونية تكون ليها علاقة بالموضوع ده.

– المعلومات المنشورة لحد دلوقتي مقالتش حاجة عن مين مالك حاوية الآثار، أو الجهة اللي كان مفروض تستقبلها .. تحقيقات النيابة لسه شغالة، والآثار اتنقلت إلى ثكنات Tofano في Nocera Inferiore في إقليم ساليرنو، اللي بتتجمع فيها الآثار المهربة من بلادها الأصلية.

– واحدة من الصور المتداولة في الصفحات المصرية ونشرتها مواقع إيطالية كمان قديمة تعود لأكتوبر 2016. وهي الصورة اللي فيها أواني صغيرة لونها بني، ودي تخص واقعة قديمة. لكن الصور التانية اللي فيها المومياء صحيحة فعلا.

– دي مش أول مرة يتم إحباط تهريب آثار مصرية لإيطاليا، مثلاً كان فيه محاولة سابقة في 2016 عملتها عصابات المافيا.