حقيقة أن هدف مجدي عبد الغني هو هدف مصر الوحيد في كأس العالم

– قبل مونديال روسيا، مصر اتأهلت لكأس العالم مرتين، والاتنين للصدفة كانوا في إيطاليا، الأول سنة 34، والتاني اللي احنا عارفينه سنة 90

– في مونديال سنة 34، مصر كانت أول منتخب عربي أفريقي يشارك في كأس العالم ممثلًا عن أفريقيا وآسيا بعد تصفيات انسحبت فيها تركيا وفاز فيها المنتخب على فلسطين 7/1 في الذهاب و4/1 في العودة في ماتش اتلعب في القدس.

– كان تشكيل منتخب مصر في كأس العالم: مصطفى كامل منصور – علي كاف – حميدو تشارلي – حسن الفار – إسماعيل رأفت – حسن رجب – محمد لطيف – عبد الرحمن فوزي – مختار التتش – مصطفى كامل طه – محمد حسن، وكان المدير الفني للمنتخب هو المدرب الاسكتلندي جيمس مكابي

– في نابولي، يوم 27 مايو 1934، مصر لعبت أول مباراة ليها في كأس العالم قصاد المجر، المباراة كانت تاريخية، بعد أما المجر سجلت هدفين، اللاعب عبدالرحمن فوزي سجل هدفه الأول في الدقيقة 36، وهدفه التاني بعده بتلات دقايق بس، وانتهى الشوط الأول بالتعادل 2/2. في الشوط التاني المجر لعبت بشكل هجومي وقدرت تحرز كمان هدفين، عشان ينتهي الماتش بفوز المجر 4/2، وخروج مصر من المونديال اللي كانت بتتطبق فيه قاعدة خروج المغلوب.

– مصر لعبت ماتش تاريخي وقتها، وتألق اللاعبين لدرجة إن عبدالرحمن فوزي تم اختياره أفضل جناح أيسر مهاجم فى المونديال وأيضا ضمن منتخب العالم، وبعد المسابقة احترف حارس المرمى مصطفى كامل منصور في الدوري الاسكتلندي.

– وبكده يكون عبدالرحمن فوزي أول لاعب مصري وعربي وإفريقي، يحرز هدف في كأس العالم.